CHƯƠNG TRÌNH THỜ PHƯỢNG DÀNH CHO BAN NAM GIỚI. CHÚA NHẬT 08.06.2025

By Mai Hdenayun in H'MÔNG on 3 Tháng Sáu, 2025

Nub kaaj 08.06.2025 (Kevcai Nub Peete-kos – Nub kaaj qha Moo zoo)

1. Ntsab lug: LUB NEEJ HLOOV PAUV.
2. Vaajlugkub: Yauhaas 3:3, 2Kauleethaus 5:17, Loo 12:2.
3. Nqai cim: “Hab ca mej tug ntsuj plig hab tej kev xaav raug hloov dua tshab, hab muab tug tuabneeg tshab lug naav, yog tug tuabneeg kws raug muab tswm kuas ncaaj nceeg hab dawb huv tseeb tag ib yaam le Vaajtswv” (Efexus 4:23-24).
4. Twv Vajluskub: Hauxeyas 4-6.
5. Tug qauv: Yeeb yaam 5’.

* TAW QHIA: Yeeb yaam 5’.

1. Caw ob peb leeg txaav xwm huv Pawg Ntseeg tuaj ua cov saib hab tso feeb.
2. Tswvyim ua:

* Tswvyim 1: Ua ntej ntau lub athiv, txhua paab ntawm cov Txiv tsev lug nyob ua ke saab laaj sau hab xyum ua ib zaaj yeeb yaam luv lawv le lub ntsab lug «Lub Neej Hloov Pauv». Nyob txwj ntawj cov pawg coob lossis tsawg es cais sijhawm, taabsws txhob ua ntev tshaaj 5 feeb.

* tswvyim 2: Ua ntej pehawm, faib cov Txiv txev ua 3 paab hab nyag nyob nyag chaw. Txug qeb ua yeeb yaam 5 feeb, cov coj ua faib rua cov pawg ib pawg ib zaajxwm luv muaj ntsab lug «Lub Neej Hloov Pauv». Sijhawm 20 feeb, pawg yuav tsum muab zaajxwm pauv ua ib zaaj yeeb yaam, faib tuabneeg ua hab xyum.

– Ib pawg zuj zug sawv lug ua yeeb yaam.

 – txujlw tso feeb.

+ Yog sijhawm: (5’) 10 feeb. Tshaaj 1 feeb tsoob ces raug tshwj ib feeb.

+ Kub sab: Txhua tug huv pawg puav leej koom teg ua: 10 feeb. Ib tug tsw ua tshwj ib feeb.

+ Ua tau zoo: 10 feeb.

+ Ntsab lug: 10 feeb (yog tas zaaj yeeb yaam yog pawg cim civ xaiv).

– Faib khoomplig.

* Cov zaajxwm paab:

CUAG NKAUS UA VAAJTSWV MIVNYUAS.

Ib tug tub tshaaj tawm nyob tebchaws Eedias pav txug ib tug tub ceevxwm tau lug su ntawm ib tug mivnyuas kws txomnyem heev lub tsev, hab kuas tug mivnyuas ntawd paab nwg txhuam khau. Tug mivnyuas ntawd txawm pib ua nwg tegnum lug ntawm txujkev kub sab lug hab ua taag sab ua rua tug tub ceevxwm xaav tsw thoob le. Hloov rua qhov kws tsuas laam txhuam saab nraud xwb, tug mivnyuas ntawd ua tuabzoo txhuam saab huv huvsi, hab txhuam moog txug thaum txhais khau ci maam tseg. Tug tub ceevxwm noog:

– Vem le caag koj yuav siv sijhawm ntau ua luaj lug txhuam kuv nkawm khau le ntawd?

Tug mivtub ntawd teb:

– Yawm, ib lub athiv dhlau lug nuav, Tswv Yexus tau lug nyob huv kuv sab hab nwgnuav kuv yog Nwg tug. Txwj ntawd lug txhua zag kws kuv txhua khau rua leejtwg ces kuv pheej xaav has tas ntawd yog tug Tswv nkawm khau hab kuv ua taag kuv lub zug. Vem kuv xaav ua kuas tug Tswv zoo sab.

* Txawm yog ua yaam dlaabtsw los thov Vaajtswv ca peb “tsw txhob ua dlejnum thaum mej tus tswv pum kuas nwg qhuas mej xwb, taabsws mej yuav tsum muab sab rua ua dlejnum tag tag rua qhov mej yog cov kws fwm tug Tswv. Txhua yaam kws mej ua, mej yuav tsum rau sab ntsho ua ib yaam le mej ua rua Vaajtswv, tsw yog mej ua rua neeg” (Kaulauxais 3:22-23).

VEM LE CAAG TSW YEEM LUG CUAG VAAJTSWV?

Ib tug ntseeg Yexus hab ib tug kws txav plaubhau ua moog rua huv ib lub zog kws pluag txomnyem heev nyob ntawm ntug nroog. Tug kws txav plaubhau has:

– Tej kws koj hab kuv pum nub nuav ua timkhawv qha tau tas yeej tsw muaj Vaajtswv tug sab dawb sab zoo ib yaam le koj pheej qha le. Yog muaj Nwg tag, ces yeej yuav tsw muaj tej kev mob nkeeg txomnyem zoo le nuav. Tej zag Vaajtswv yeej yuav muaj fwjchim txwv tau kuas txhob muaj neeg quav luam yeeb, dlej cawv hab lwm yaam kev phem kws ua rua puab lub neej puag taag kaj!

Tug ntseeg Vaajtswv yeej tsw caav moog txug thaum kws ntsib ib tug txwv neej naav khaub dluag ndluag ndhuas, plaub hau ntev loo txug nraag dluav hab tseem muaj ib tauv hwjtxwv hab, maam le has:

– Yog koj yog ib tug kws txav plaubhau keej tag, tej zag koj yeej yuav tsw ca kuas muaj tej tug txwv neej yawg plaub ntev loo hab ntxhuv nyo le ko le, hwj txwv los tub tsw chais hab.

Tug kws txav plaubhau npau tawg vog has:

– Vem le caag lam txim rua kuv? Kuv yuav ua caag txwv tau nwg? Nwg yeej tsis muaj ib zag kws yuav tuaj tom kuv lub tsev txav plaubhau le? Yog nwg yeem tuaj ca kuv txav plaubhau hab chais hwj txwv, tsuas yog pebcaug feeb xwb yawd dhlau ua neeg zoo nraug kag xwb maj!

Tug ntseeg Vaajtswv thaum ntawd maam le ua tuabzoo has:

– Yog le ntawd koj kuj tsi txhob lam txim rua Vaajtswv tas vem le caag Nwg yuav ca tej tuabneeg ua neej txomnyem ntsuav le ntawd hab. Vem tus thaus twg los Nwg yeej nqua hu kuas txhua tug lug cuag Nwg kuas tau txais kev cawmdlim. Vimchij kws puab tseem pheej ua neej rua txojkev phem kev qas los tub vem yog puab tsis yeem lug cuag Vaajtswv tug kws hlub puab. Tug Tswv yeej ncaaj nceeg. Tug kws txav plaubhau noog txug ntawd maam le tsim dhleev.