CHƯƠNG TRÌNH THỜ PHƯỢNG DÀNH CHO BAN THANH NIÊN. CHÚA NHẬT 05.01.2025

By Mai Hdenayun in H'MÔNG on 24 Tháng Một, 2025

Hnub kaj 05.01.2025

1. Ntsiab lus: Nrhiav Paub Vajtswv Tus Dej Siab.
2. Vajluskub: Chivkeeb 12:1-5, Henplais 11:8-12.
3. Nqe cim: “Kuv tus Vajtswv, kuv yeej txaus siab ua zoo kom haum koj siab. Kuv yuav khaws koj tej lus qhia rau hauv kuv lub siab mus li” (Ntawv Nkauj 40:8).
4. Twv Vajluskub: Paj Lus 1-5.
5. Tus qauv: Qhuab qhia.

* TAW QHIA: Qhuab qhia.

1. Caw tus (Xibhwb, Txwjlaug) qhuab qhia ua ntej 2 athiv.
2. Sau rau hauv ntawv ntsiab lus, Vajluskub, nqe cim thiab muab rau tus qhuab qhia kom tus ntawd qhia raws li Pab Hluas tsab kom tswj. Yog cheem tsum, kuj muab feem ntaub ntawv pab rau tus ntawd qev.

* NTAUB NTAWV PAB.

Yuav ua li cas kom paub meej Vajtswv tus dej siab rau yus lub neej? Ib yam li Tswv Yexus tau txais ib tes haujlwm tshwj xeeb hauv ntiajteb no yuav tsum tau ua kom tiav. Peb txhua tus yog cov uas ntseeg Nws kuj tau cob ib tes haujlwm tshwj xeeb yuav tsum tau ua kom tiav thiab. Feem xyuam ntawm tus ntseeg Yexus yog nrhiav paub Vajtswv tus dej siab rau yus lub neej.

1. TSWVYIM NRHIAV PAUB VAJTSWV TUS DEJ SIAB.

Qhov uas nrhiav paub Vajtswv tus dej siab cuam tshuam txog txojkev sib raug zoo ntawm koj nrog Vajtswv txhua nub. Tiamsis muab hais los peb muaj ib txojlw li hauv qab no:

– Ua tibzoo mloog thaum Vajtswv tabtom hais rau koj.

– Paub meej Vajtswv tes haujlwm rau koj lub neej.

– Cia siab thiab ua kom tiav tej uas Nws twb tau cog lus.

Tsis txhob txhawj, Vaj Ntsujplig yuav yog koj tus xibhwb (Yauhas 14:26). Nws yog Tus uas yuav qhia koj siv tej txojlw no kom los phim rau Nws lub homphiaj rau koj lub neej. Tsuas muaj Vajtswv thiaj paub peb lub neej tom ntej thiab muaj peevxwm xaiv kev rau peb taus. Peb tsis muaj peevxwm npaj homphiaj rau peb lub neej. Vajtswv tsis nthuav qhia rau peb pom deb deb txog lub neej, tiamsis Nws yeej qhia ib kauj ruam zuj zus “Tus Tswv yeej yog tus uas coj neeg txoj haukev” (Ntawv Nkauj 37:23).

Txhua yam haujlwm uas muaj lub ntsiab zoo tshwm los rau koj lub neej puav leej yog Vajtswv ua tus coj. Tus Tswv txhawj txog koj lub neej heev dua koj. Vim Vajtswv tus dej siab yeej zoo thiab puv ntoob rau txhua tus uas ntseeg Nws.

1. KAWM RAWS APLAHAM.

Aplaham tau caum Vajtswv qab los ntawm txojkev ntseeg tsis yog los ntawm qhov muag pom. Hauv Chivkeeb 12:1-5, Vajtswv tau hais dabtsis? Nws txojlus tshwj xeeb li cas? “khiav tawm” thiab “mus” – Mus qhov twg? “mus rau lub tebchaws uas kuv yuav qhia rau”. Koj puas npaj siab caum Vajtswv qab raws li txojlw no?

Ntau zuag, kuj ib yam li Aplaham, Vajtswv hu tibneeg tsuas los caum Nws qab xwb. Tej zaum Nws yuav hu koj los raws Nws qab ib hnub zuj zus, tus Tswv yuav tsis txhais qhia meej meej rau koj ua ntej koj pib mloog Nws lus.

Nco ntsoov tias tus Tswv xav npaj ib lub homphiaj loj rau koj lub neej nrog rau tej phomphiaj me huv si. Cia li ua siab ntev tos thiab Nws yuav qhia lub homphiaj ntawd rau koj txhua hnub. Koj tsuas cheem tsum qhov kaj rau txhua kauj ruam xwb. Cia li mus raws li tus duab ci uas Vajtswv ci tuaj Nws yauv rov pub lwm tus duab ci ntxiv rau koj.

III. LOS CUAG TSWV YEXUS.

Thaum los cuag Tswv Yexus kom nrhiav paub Nws tus dej siab rau koj lub neej, nqe twg yuav muaj cuab kav siab dua rau koj siv los hais?

1. Tus Tswv, koj xav kom meyau ua dabtsis? Thaum twg ua yam ntawd? Ua li cas? Yuav ua rau qhov twg? Ua nrog leejtwg? Thiab thov cia paub paj ntsig thaum kawg li cas?
2. Tus Tswv, thov qhia meyau ua ib kauj ruam zuj zus thiab meyau yuav ua.

Thawj lo lus teb yog zoo li rau peb txhua tus huvsi puas yog? Peb tshaj sij nug tus Tswv “daim ntawv qhia kev” uas meej heev. Peb pheej hais “Yog tias tus Tswv qhia rau kuv paub kuv tabtom mus rau qhov twg ces kuv mam sawvkev mus thiab mus tau”. Tiamsis qhov uas tus Tswv cheem tsum ntawm peb yog raws Nws qab ib hnub zuj zus. Peb yuav tau ua rau tus Tswv raws li nqe lus nug thib ob.

Tswv Yexus hais: “kuv yog txojkev”, Nws tsis hais “Kuv yuav muab daim ntawv qhia kev rau koj”. Nws yog koj txojkev taug. Yog mus raws li Nws coj, koj yuav nyob rawv hauv Vajtswv tus dej siab, thiab Nws xav siv koj rau ib tes haujlwm tshwj xeeb. Yog tsis cia tus Tswv coj kev, yuav zoo li cas yog tias koj tsis paub kev? Koj yuav txhawj heev txhua zaug uas muaj kev tshuam, koj pheej poob siab thiab txiav txim siab tsis tau. Ntawd tsis yog txojkev ua neej uas tus Tswv npaj rau koj.

LUS NUG XAV THIAB SIV

1. Yog ib tus ntseeg Yexus, koj ua dabtsis thaum ntsib teebmeem hauv lub neej?
2. Vajtswv tau coj koj kev li cas rau hauv kev nrhiav paub Nws tus dej siab.
3. Koj ua raws li tus Tswv tag nrho lossis daws teebmeem raws koj siab nyiam?
4. Thaum raws tus Tswv qab, koj ntsib tej kev nyuaj twg?
5. Dhau zajkawm hnub no, koj yuav ua li cas kom mus raws nraim li Vajtswv lub homphiaj rau koj lub neej?