CHƯƠNG TRÌNH THỜ PHƯỢNG DÀNH CHO BAN THANH NIÊN. CHÚA NHẬT 08.06.2025
By Mai Hdenayun in H'MÔNG on 3 Tháng Sáu, 2025
Hnub kaj 08.06.2025 (Lễ Ngũ Tuần)
- Ntsiab lus: “TXOJMOO ZOO”.
- Vajluskub: Loos 6:23; 7:18-21; 5:6.
- Nqe cim: “Rau qhov nqi zog ntawm txojkev txhaum yog kev tuag, tiamsis txoj koob hmoov uas Vajtswv pub dawb yog txojsia ntev dhawv mus ibtxhis uas los ntawm Yexus Khetos tus uas yog peb tug Tswv los” (Loos 6:23).
- Twv Vajluskub: Tsis Twv Vajluskub.
- Tus qauv: Tshaj tawm.
* TAW QHIA: Tshaj tawm
- Sau tsab komtswj kom txhua tus muaj cuab kav koom tau:
- Muab cov qeb no tso rau lwm athiv xws li: Zaj nkauj homthawj, pauj nqe qub kawm nqe tshiab, twv Vajluskub, fij khoom, nyeem zaj thov tsoos.
- Tsab kom tswj yuav tsum luv, yooj yim (ntev tshaj yog 75 feeb), nrawm nroos hloov pauv tus qauv piav qhia txojmoo zoo xws li: Qhuab qhia, piav lus, daws teebmeem, sib tham, ua yeeb yam, saib yeeb yaj kiab, nkauj, kev ua si…
- Cov thawjcoj pawg ris feem xyuam rau lub rooj tshaj tawm no thiab hais kom txhua tus kawm yuav tsum tau koom tes: Thov Vajtswv, caw phoojywg, txais qhua…
- Tsimnyog muaj sijhawm haus dej sib tham: Noj ncuav qab zib, haus dej, sib tham, ua timkhawv los cog phoojywg thiab nqua hu txais yuav Yexus.
* NTAUB NTAWV PAB.
Kev ntseeg Txojmoo zoo puas yog ib txojkev ntseeg kom ua zoo? Txhua tus neeg puav leej feeb tau yam zoo thiab yam phem. Leejtwg los yeej paub “ua zoo tau zoo“ Leejtwg los yeej xav noj qab nyob zoo. Raug cuam tshuam los ntawm kev ntseeg Nho Giáo, neeg NYAB Laj tseem paub huab hwm txojkev ua neeg, nco xibhwb txiaj ntsig, paub ua neeg zoo, paub kevcai, paub tsis hloov siab. Feeb coob haiv neeg Nyab Laj puav leej hwm kev ntseeg heev, tsis ntseeg yam no los kuj ntseeg yam tod. Txij ntawd los muaj coob leej txawm xav tias txojkev ntseeg twg los yeej zoo, yeej qhia kom luag ua zoo nyob huv xwb. Yog li ntawd, yog tias kev ntseeg Txojmoo zoo kuj yog ib txojkev ntseeg kom ua zoo thiab xwb ces tsis tag ntseeg, vim yus twb muaj kev ntseeg lawm, tshaj ntawd yus txojkev ntseeg tseem muaj neeg ntseeg coob tshaj. Qhov tseeb mas lo lus Moozoo muaj lub ntsiab tias “Tsab xov zoo”, lub ntsiab tsis yog ntseeg kom ua zoo. Yog tseem qhia ntxiv rau neeg ib txojkev ntseeg kom ua zoo thiab ces seem lawm, vim txij thaum me los txog nimno leejtwg los paub tias yuav tsum ua zoo. Qhov tseem ceeb uas yuav tsum tau pom ntawm no yog yeej yuav tsum ua zoo, tiamsis neeg tsis muaj peevxwm ua kom tau zoo txaus. Timthawj Paulus tau sau qhia txog zaj no li no: “ Kuv paub hais tias kuv yog neeg xwb, kuv thiaj ua tsis tau ib qho zoo li. Kuv xav ua zoo, tiamsis kuv ua tsis tau. Kuv xav ua qhov zoo, tiamsis kuv ho tsis ua; kuv tsis xav ua qhov phem, tiamsis kuv ho ua. Yog kuv ua tej uas kuv tsis xav ua, tej ntawd yeej tsis yog kuv ua, tiamsis yog txojkev txhaum uas nyob hauv kuv lub siab ua. Yog li ntawd, kuv pom txoj kevcai zoo li no: thaum kuv xav ua qhov zoo, kuv ho xaiv ua qhov phem “ (Loos 7:18-21). Qhov uas peb ua tsis tau zoo txauis los twb vim yog txojkev cai ntawm txojkev txhaum tseem nyob no thiab tswj tsawv hauv peb txhua tus. Txawm yog tag sim neej kuv siv zog ua zoo, tiamsis tsuav yog ib hnub kuv ua tib qhov txhaum xwb ces txhua yam puav leej plam huv si. Vajluskub sau: “ Tus uas ua txhaum Vajtswv txoj kevcai ib nqe xwb, ces kuj yog nws ua txhaum txhua nqe huv tibsi “ (Yakaunpaus 2:10).
Txawm yog peb tsis tau ua txhaum ib qhov nrog rau tibneeg txojkev cai los tabmeeg Vajtswv peb yeej raug xam tias yog neeg txhaum. Txawm yog peb ua tau ntau yam haujlwm zoo rau tibneeg los tabmeeg Vajtswv, peb yeej tsis tau zoo txaus. Tibneeg tej haujlwm zoo puav leej raug Vajtswv saib zoo li lub tso uas twb lo roj qias neeg lawm. Vajtswv txojkev cai yeej zoo kawg nkaus, tiamsis tibneeg tsis muaj zog ua tau. “Txhua tus puav leej ua txhaum thiab tsis muaj Vajtswv lub hwjchim. Timthawj Paulus hais ntxiv: “ Ua cas kuv yuav nyuaj siab ua luaj li? Leejtwg thiaj yuav cawm tau kuv dim ntawm lub siab uas coj kus mus raug kev ploj kev tuag? Kuv ua Vajtswv tsaug uas peb tus Tswv Yexus Khetos twb pab kuv dim lawm. Yog li ntawd, kuv lub siab ua raws li Vajtswv kom kuv ua, tiamsis kuv lub cev ua raws li txojkev txhaum kom kuv ua ” (Loos 7:24-25).
Ua Vajtswv tsaug, vim paub tseeb tias neeg tsis muaj peevxwm ua tau zoo, kuj tsis muaj peevxwm cim civ cawm yus dim ntawm txojkev txhaum, yog li ntawd “ Yexus Khetos thiaj los tuag txhiv peb cov uas yog neeg txhaum raws li lub sijhawm uas Vajtswv teem tseg lawm” (Loos 5:6). Vim yog muaj Tswv Yexus txojkev tuag txhiv thiab Vaj Ntsujplig lub hwjchim, thaum tus neeg txhaum lees paub kev txhaum thiab lees txim, txiav txim siab tig los cuag Vajtswv; ces Vajtswv pub rau tus ntawd muaj cuab kav dhau los ua neeg tshiab. Kuj pub rau tus ntawd muaj peevxwm ua tau tej haujlwm zoo uas yav ntej nws yeej tsis muaj peevxwm ua tau li. No yog ib “Tsab xov zoo”, yog ib txojkev taug uas zoo kawg nkaus rau peb txhua tus. Yog niaj hnub no nej tabtom raws ib txojkev ntseeg qhia ua zoo, ntawd yog ib qhov zoo vim tau qhia tshwm nej txojkev txiav txim siab ua yam zoo, zam yam phem. Tiamsis, hauv txojkev siv zog li ntawd, nej yuav ntsia pom tias yus ua zoo tsis tau txaus, tsis kaj siab, tsis paub tseeb tias yuav ua zoo txog qeb twg thiaj tau mus ntuj ceeb tsheej. Txhua tus uas tabtom cim civ nrhiav kev cawmdim rau yus puav leej muaj txojkev txhawj ntshai li ntawd. Tiamsis tus ntseeg Txojmoo zoo paub tseeb tias yus twb tau cawmdim lawm, lawv muaj kev kaj siab, muaj kev cia siab. Tus ntseeg Txojmoo zoo paub tseeb tias thaum tag sim neeg lawm yuav tau mus nrog Vajtswv nyob saum ceeb tsheej kiag. Vim txojkev cawmdim yog qhov khoomplig uas Tswv Yexus twb ua tiav thiab muab pub rau peb. Qhov khoomplig no tsis yog vim peb ua zoo kom tsimnyog tau txais tiamsis yog Vajtswv txojkev hlub peb rau xwb. “ Rau qhov nqi zog ntawm txojkev txhaum yog kev tuag, tiamsis txoj koob hmoov uas Vajtswv pub dawb yog txojsia ntev dhawv mus ibtxhis uas los ntawm Yexus Khetos tus uas yog peb tug Tswv los“. Vajtswv Ntuj tau cog lus tseg li ntawd, vim Nws yog tus tsis hloov. Cia siab tias nej yuav qheb siab txais yuav Tswv Yexus txojmoo zoo kom tau txais txojkev cawmdim, kev kaj siab, tso siab thiab txojsia ib txhis uas yog tus Tswv pub rau.
Mục sư Nguyễn Văn Huệ (Theo TinLanhHyvong.com)