CHƯƠNG TRÌNH THỜ PHƯỢNG DÀNH CHO BAN PHỤ NỮ. CHÚA NHẬT 23.02.2025

By Mai Hdenayun in H'MÔNG on 18 Tháng Hai, 2025

Hnub kaj 23.02.2025.

1. Ntsiab lus: AUNPADIYAS – TUS CEVLUS TXOG KEV TXIAV TXIM RAU TUS UAS SAIB TSIS TAUS TUS TSWV HAIVNEEG.
2. Vajluskub: Aunpadiyas 1:1-21; Chivkeeb 25:23-26:36-43; 2Kevcai 2:2-7.
3. Nqe cim: “tus Tswv yeej nyiam txojkev ncaj ncees thiab tsis tau muab nws haivneeg uas muaj kev ncaj ncees tso tseg li. Nws tsomkwm lawv mus ibtxhis tsis kawg, tiamsis cov neeg siab phem tej xeebntxwv yuav raug ntiab tawm mus.…” (Ntawv nkauj 37:28).
4. Twv Vajluskub: Yelemis 19-21.
5. Tus qauv: Daws kev khuab xyeeb.

TAW QHIA: Daws kev khuab xyeeb.

1. Tshaj tawm lub ntsiab lus “AUNPADIYAS – TUS CEVLUS TXOG KEV TXIAV TXIM RAU TUS UAS SAIB TSIS TAUS TUS TSWV HAIVNEEG.” rau cov niamtsev, thiab sau lawv tej lus nug los cob rau tus saib sab kev kawm.
2. Tus saib sab kev kawm yuav caw ib tus uas paub Vajluskub zoo los Daws kev khuab xyeeb thiab teb lawv tej lus nug.
3. Txhua lolus nug yuavtsum tso muaj txheej txheem kom tus uas mloog thiaj yoojyim totaub txog lub ntsiab lus. Tom qab uas teb tas lawd, yuavtsum siv sijhawm tos ib pliag kom lawv xav thiab nug ntxiv.
4. Cov coj los kuj yuavtsum Tshawb nrhiav yus pab niam tsev tej kev cheem tsum thiab pab lawv nug thiab, vim muaj ntau leej lawv xav nug tiamsis vim txajmuag tsis kav nug. Tsis tas li ntawd cov coj los kuj yuavtsum npaj ntau lolus nug, npaj rau lub sijhawm yog tias muaj lus nug tsawg dhau lawm ces thiaj tau nug kom sawvdaws thiaj totaub lub ntsiab lus zoo, koj thiaj ua tiav zaj kawm hnub ntawd.

I. QHIA TSHWM.

Aunpadiyas, lub npe muaj ntsiab lus tias “Tus Tswv tug tub qhe”. Lub sijhawm uas Vajtswv hu Aunpadiyas los ua haujlwm kuj tsis meej pejtsawg, tiamsis kwv lam li ua ntej Yelemis uas yog xyoo 850-840 UY Phau Aunpadiyas lub ntsiab lus yog qhia tshwm kev txiav txim rau lub nroog Edoos thiab qhia tshwm kev kaj siab yav tom ntej ntawm haivneeg Yixalayees. Aunpadiyas qhia tshwm qhov teebmeem: Yuav ua cas tus uas raug luas saib tsis taus thiaj nrhiav tau kev nplig siab thiab tus neeg phem thiaj pom txog Vajtswv txojkev ncaj ncees?

II. ZAJ KAWM.

1. Haivneeg Edoos thiab haivneeg Yixalayees.

Yawg koob ntawm haivneeg Edoos yog Exaus, Yakhauj tus tijlaug ntag. Txawm hais tias Exaus saib lub npe tij tsis muaj nqis, nws tsis tau Ixaj foom koob hmoov los nws cov xeebntxwv kuj huam vam thiab vam meej rau tom qab no thiab. Nyob rau tiam Aunpadiyas lub nroog Xelas thiab tom qab no hloov npe hu ua Pe-tra yog lub nroog Edoos ntag. Tej qubtxeeg uas luas tej neeg Tshawb nrhiav nrhiav tau xyoo 1812. Tej thwvcib uas nrhiav tau txhais hais tias lawv yog ib haivneeg uas vammeej.

Tebchaws Edoos hauv duab tebchaws ces yog txij ntawm roob Edoos mus txog ntua ntawm ntug hiavtxwv A-qa-ba txog rau Hiavtxwv Tuag. Tebchaws no av zoo rau tej txiv hmab, nplej, txiv ncuav pias, txiv ntoo roj… Haivneeg Edoos kuj txhim muaj ntsa yeej puagncig kom tej yeebncuab tuaj tua tsis tau lawv. Vim muaj tej roob siab nyob puagncig, lawv kev tawmtsam tej yeebncuab yog ib qhov uas tsis nyuaj. Vim qhov uas lawv yog cov kav txojkev mus ntawm ntug hiavtxwv A-qa-ba mus rau Iziv lawv thiaj muaj kev vammeej los ntawm sab kev lagluam, ua rau lawv lub tebchaws kuj vammeej dua lwm lub tebchaws hauv tiaj suabpuam ntawd. (Yelemis 49:7; Yauj 4:1-6) Txawm tias lub tebchaws Edoos yog ib lub tebchaws nyob npuab tebchaws Yixalayees, thiab lawv kuj muaj kev sib raug zoo me ntsis los haivneeg Edoos yeej tsis hlub tshua txog haivneeg Yixalayees thaum uas haivneeg Yixalayees raug vajntxwv Nenpukanexales tuaj tua xyoo 586 UY Tej uas tsis zoo ntawm haivneeg Edoos muaj tshwm los ntawm ob yam uas lawv ua:

(1) Lawv nrog yeebncuab zoo siab(c.10-13): Txojkev chim uas Yakhauj txeeb Exaus koob hmoov txawm hais tias twb tau daws (Chivkeeb 33) lawm los nws yeej tseem nyob rawv hauv Exaus nruab siab thiab pheej tshwm tsuj tsawv rau Exaus cov xeebntxwv nruab siab. Lawv yeej tseem nco tsuj tsawv!

(2) Ua saib tsis taus tej neeg uas nrhiav kev khiav (nqai.14): Lawv tsis yog tuaj ib sab ntsia thaum uas yeebncuab tuaj tua nroog Yeluxalees xwb, lawv tseem nqis tes ntes tej neeg uas nrhiav chaw khiav tawm hauv tebchaws coj mus cob rau yeebncuab thiab.

2. Vajtswv txojkev txiav txim.

Aunpadiyas ceebtoom rau haivneeg Edoos txog tej yam li nram qab no:

(1) Tsis txhob khavtheeb: Vim qhov nej muaj toj roob hauv peg nyob puagncig, vim qhov nej muaj kev vammeej. (Aunpadiyas n. 3-4).

(2) Tsis txhob vamkhom tej kev phoojywg nrog lwm lub tebchaws (n.7).

(3) Tsis txhob cia siab rau kev txawj ntse (n.8).

(4) Tsis txhob cia siab kev muaj zog ntawm tubrog (n.9).

(5) Tseb yam twg ces sau yam ntawd: “Tej uas koj ua yuav rov los raug rau koj!” Edoos tau huab noj huab haus ntawm txojkev lag luam li cas ces txog hnub uas tus Tswv txiav txim yuav raug ib yam li ntawd! Lolus ceebtoom qhia rau peb paub li no:

(1) Tibneeg tej chaw nkaum ces tsis muaj qabhau: Txawm yuav nkaum rau ntawm tej txhib zeb, lossis khiav mus rau saum tej roob siab los yeej zam tsis dhau tus Tswv txojkev chim li (Yaxayas 26:3-4).

(2) Tibneeg txojkev txawj ntse los yeej cawm tsis tau lawv dim hnub uas tus Tswv txiav txim li (1Kauleethaus 1:30; Yauhas 5:24).

Raws li tej uas Aunpadiyas cevlus txog kev txiav txim rau Edoos hauv (1:1-14) ces twb tshwmsim lawm. Dhau los ntawm kev Tshawb nrhiav keebkwm ces kwvlam li xyoo 400 haivneeg Ả-rập tuaj tua haivneeg Edoos thiab yuam haivneeg Edoos khiav mus nyob rau sab qabteb Palestine lawv lub tebchaws yau thiab pluag ib yam li Aunpadiyas tau cevlus (n.1,5-8). Edoos yuav raug txiav txim rau lub sijhawm thaum kawg (1:15-21). Txawm tias Vajtswv tau muab haivneeg Yixalayees cob rau lwm haivneeg los tus Tswv yeej yuav txiav txim rau lwm haivneeg li tej uas lawv tau ua rau haivneeg Yixalayees lawm. txog hnub tus Tswv txiav txim, Edoos yuav raug txiav txim tiamsis haivneeg Yixalayees yuav tau koob hmoov:

(1) Vam meej: Lawv yuav rov tau txais lawv tej yawg koob lub tebchaws los ua lawv tug (Exekees 37:16-22; Hauxeyas 1:11).

(2) Ciam av los yuav nthuav dav (n.19). Keeb kwm sau tshwm tias thaum haivneeg Yixalayees raug ntes mus ua cev qhev, haivneeg Edoos tau tuaj txeeb cov nroog uas sab qab teb ntawm tebchaws Yudas Giu-đa, Negel yog thaj av nyob sau sab hnub tuaj ntawm sab roob Falas. Lolus no hais txog hnub uas tus Tswv Yexus rov qab los cawm haivneeg Yixalayees dim ntawm lawv tej yeebncuab, los ua Vajntxwv kav lub ntiajteb no. Kev txiav txim rau Edoos qhia rau peb paub txog:

– Vajtswv yog tus uas ncaj ncees.

– Kev txiav txim rau txhua lub tebchaws yog tus Tswv ua tus tswj.

– Vajtswv txojkev txiav txim txaus ntshai thiab ncaj ncees.

Edoos rau txiav txim vim tias: (1) Edoos txojkev khav theeb yog saib tsis taus tus Tswv yog hla Vajtswv txoj kevcai uas Nws cheem tsum ib tus tibneeg yuav tsum hwm Nws. Vajluskub sau tseg hauv (Daniyees 4:30-31; Tes haujlwm 12:23). (2) Kev qias duab ntawm haivneeg Edoos tau hla Vajtswv 6 nqe kevcai tom qab uas Vajtswv sam hwm kom ib tus yuav tsum hlub ib tus (Mat 22:36-39). Tej uas haivneeg Edoos tau ua, ua rau Vajtswv yuav tsum txiav txim ncaj ncees rau lawv li tej uas lawv tau tseb (Aunpadiyas 1:15).

Vajtswv txojkev txiav txim yog raws li ob yam no:

1. Peb tus cwjpwm nrog rau Vajtswv.
2. Peb tus cwjpwj thiab tej uas peb ib leeg ua rau ib leeg.

    3. Zaj kawm rau peb lub neej.

(1) Tsis txhob khav theeb, ntawm Vajtswv xubntiag yuav tsum muaj kev txo hwjchim.

(2) Tsis txhob sib ntxub, yuav tsum hwm tus uas Vajtswv twb xaiv lawd (Mal 1:3).

(3) Tsis txhob ua phem pauj phem, yuav tsum sib hlub sib zam txim: Txawm Vajluskub sau tias “Vajtswv hlub Yakhauj, ntxub Exaus”. Qhov ntawd yog Nws txojkev xaiv uas peb tsis totaub txog (Vajtswv yeej pom txog Yakhauj nplooj siab ntshaw, hlub, mloog Vajtswv lus). Tiamsis raws li kev ncaj ncees, Vajtswv yeej foom koob hmoov rau Exaus ib yam li Yakhauj thiab. Hauv (2Kevcai 2:4-7) thaum haivneeg Yixalayees tab tom taug kev mus rau hauv tebchaws Kana-as, Vajtswv yeej samhwm kom lawv tsis txhob txeeb ua rog nrog haivneeg Edoos li, tiamsis yuav tsum ua zoo rau yus tug kwvtij. Yog li ntawd, kev txiav txim rau haivneeg Edoos yog qhov uas ntuag peb txog kev sib raug zoo nrog rau yus tej kwvtij zej zog, ib yam li Yexus tej lu qhia: (Mat 5:7) ib yam li Paulus tej lus ntuag (Efexaus 4:32).

Xaus lus li no tias, tej lus uas hais txog kev txiav txim rau lub nroog Edoos txhawb kom peb txhua tus ntseeg yuav tsum cia siab rau Vajtswv thiab rau siab ntso ua haujlwm zoo, tshwjxeeb yog ua zoo rau tej neeg ib ncig vim paub hais tias Vajtswv yog tus uas ua ncaj ncees thiab tuaj tus neeg dawbhuv tog.

III. LUS NUG XAV THIAB SIV.

1. Caw koj nyeem (Aunpadiyas 1:1-9; Chivkeeb 36:6-9) tshawb txog thaj tsam uas yog ciam teb Edoos, lawv haiv neeg, lawv tej kev vam meej thiab lawv tej kev xyaum ua zoo.
2. a. Ntawm haivneeg Yixalayees thiab haivneeg Edoos lawv sib txheeb ze li cas? (Chivkeeb 25:23-26; 36:6).

         b. Haivneeg Edoos ua li cas thaum uas haivneeg Yixalayees raug txomnyem? (Aunpadiyas 1:10-14).

    3. a. Aunpadiyas ceeb toom rau haivneeg Edoos txog yam dabtsi? (1:3-4; 7; 8; 9; 15).

        b. Thaum txog hnub uas tus Tswv txiav txim, haivneeg Edoos thiab haivneeg Yixalayees yuav zoo li cas? (Aunpadiyas 1:2-9,15-21).

    4. Hauv txojkev txiav txim rau Edoos qhia peb txog:

1. Tej uas peb ua rau peb tej kwvtij ib ncig?
2. Tej uas peb ua rau tus neeg uas Vajtswv xaiv?
3. Peb nploojsiab thiab peb tus cwjpwm ntawm Vajtswv xub ntiag?

    5. Tej lus uas Aunpadiyas cev ntsiab lus yog li cas? (Ntawv nkauj 37:1-3,28; 1:6).

   6. Sau tej uas tseemceeb dhau los ntawm tej lus uas Aunpadiyas tau hais.

   7. a. Koj yuav txo hwjchim ntawm Vajtswv lossis koj yuav cia siab rau koj tej kev txawj ntse?

      b. Thaum koj tej kwvtij ntsib kev txomnyem koj yuav ua li cas rau lawv?

* HIỂU BIẾT THƯỜNG THỨC.

 Tẩy Vết Mực.

Nếu là mực thường thì cắt một miếng chanh tươi thoa vào chỗ dính mực sau đó giặt lại bằng xà bông và xả nước sạch. Vết mực sẽ hết. Nếu là mực bút bi thì tẩy mực bằng cồn 90 độ.